الثلاثاء، ٢٦ يونيو ٢٠٠٧

قماشة وأخوانها

بسم الله الرحمن الرحيم
السلام عليكم ورحمة الله وبركاته
حياكم الله بالمدونة ويا هلا فيكم وكلي شوق لكم
كل انسان بهالدنيا له ناس غاليين حيل عليه وغلاتهم محفورة بالقلب , نرتاح لهم ونحس بالأمان بوجودهم
على كثر ما نحبهم يحبونا , وعلى كثر ما نحترمهم يحترمونا
اليوم بقول لكم عن أعز الناس وأقربهم على قلبي
أخواني الله يحفظهم
الأخو له معنى كبير بحياتي
الأخو عضيد وعزيز والأخو فخر وسند لأخته والأخو بأي وقت تحتاجه تلقاه
أخواني يفهموني من غير لا أتكلم وأحلى كلامهم لما يقولون يا اختى لا تحاتين أي شي ولا تحتاجين حق أي أحد واحنا يمج
والأحلى من هذا يوم كانوا صغار كنت دايما أسمعهم يحلفون براسي بكل ثقة عند ربعهم
وبعد هالكلام ما وراه كلام
فلاتلموني بحبهم
اهم ماي العين ونورها
في يوم كنا منسدحين اجبال التلفزيون انطالع الرسوم المتحركة
فسألني أخوي قماشة اشلون هالببايات يدشون بالتلفزيون
رد أخوي الثاني وقال : يدشون من الاريل أكيد
رديت عليهم وقلت لهم انتوا غلطانين اهما موجودين اصلا داخل التلفزيون
ردوا أخواني عليّ : الله يخليج قماشة طلعيهم وجسميهم علينا
واقعدوا يحنون عليّ
وكل يوم هذي قعدتنا نفكر اشلون ندبر لنا تلفزيون ثاني
فخططنا ناخذ تلفزيون عمتي , لكن أملنا ناخذه منها لأنها كله مجابلته
فكرنا بيدتي لكن الفقيرة ماعندها إلا رادو, اتكفخة وبالزور يشتغل
لذاك اليوم اللى كنا قاعدين على الدجة , جان يطلع الوالد من البيت يبي يروح بيت يارنا اوموه واحنا طبعا ركض وراه
رحب اوموه بالوالد , واخواني دشوا البيت , اهني آنا تنحرت بمكاني لانى شفت العجب بالحوش
تلفزيونات انواع وأحجام
وراحت فيني الأحلام وانا اطالعهم
وشوي الوالد طلع وسلم عليه
انا واخواني سألنا الوالد : يبه اشفيه اوموه
قال يبي يشيل من الفريج
انا طبعا طرت من الوناسة وبعدها ناديت اخواني وقلت لهم انتوا ليلحين مصممين على اللى براسكم ولا لأ
ما تبون الببايات ؟؟ تعالوا اسويلكم خوش خطة
اول شي اللى ابيه منكم تراقبون اوموه كل حزة لين يشيل وثاني شي لا تقولون حق اعيال الفريج عن شيلة يارنا
ليما يه اليوم اللى شفنه اوموه واهله قاعدين يحطون أغراضهم بالسيارة
وبعدها مِشوا
اهما مشو من اهني والخطة الثانية اشتغلت من اهني
ودشينا البيت , طبعا ماخذين كل أغراضهم إلا تلفزيون واحد هادينه
صج انه كان حلمي ان كل واحد فينا ياخذ تلفزيون بس شنسوي
( ياحلو احلام اليهال )
شال اخوي التلفزيون ووديناه يم بيت مهدوم
فقام اخوي الثاني وياب اصخرة عودة وحذفها على التلفزيون جان يتفلش التلفزيون وتنكسر شاشته واهني ركضنا عشان انخمط الببايات اللى داخل جان ننصدم !! ماشفنا شي
واحلامنا طارت بالهوى ما شفنه الا وايرات ملونه واشياء ثانية معدنية
فحمق اخوي ومن القهر هدنا
اخوي الثاني قال لى خليني الحقه يا قماشة قبل لا يفتن علينا ويقط السالفة بروسنا
في اللحظه هذي اخوي ما انتبه على القزاز اللى عالارض جان تدش بريله قزازة وتنشق ريله وهو بعد الله خير من شاف الدم سوه فيلم بالصراخ واهني انا توهقت شسوي !! الحق اللى حمق وراح ولا أسكت اللى انشقت ريله
اتسمرت بمكاني وما عرفت شسوي
وشوي ولا الحبيب وصل مع العايلة المصونة ( امي وعمتي ) شافوا الدم واخوي يصارخ
فبسرعة شالوه وودوه المستوصف ومن ارجعوا
وهم يدورني دواره وبعدها توحدوا فيني عدل
طق وتقرص وتمجع
وانا اصارخ واقول اتوب اتوب بعد ما اسوي جذي
واهما عمك اصمخ طق بطق
وبعدها بجم يوم
اخوي اللى فتن علينا داش مع ربعه البحر والمايه رايحة جان تطقه فريالة
وتورم ريله وودوه المستوصف واهناك اكتبوا له جم ابره لازم يطقها عشان يخف الورم
وتجابلنا احنا الثلاثة المتعورين
كل واحد فينا يقط السالفة براس الثاني
هذا يقول كله منك وهذاك يقول كله منج
وبعدها بجم شهر خذتنا يدتي الله يرحمها بيت خوالي بشرق واهناك كان بنفس اليوم تصوير تلفزيوني
( اوبريت هذا عودي هذا عنتر لا تقولون عنه امكسر )
لـسعاد عبدالله والمرحوم خالد النفيسي
وكان الاوبريت في بيت اللاعب سامي الحشاش الله يذكره بالخير
جان يستانسون خنت حيلي اخواني وراحوا مع يهال الفريج بيت سامي وصوروهم واطلعوا بالتلفزيون
قبل كانوا يفكرون اشلون يطلعون البباي من التلفزيون والحين اهما اللى داخل التلفزيون
فكل ما يطلع الاوبريت نتذكر سالفة التلفزيون وخطتنا

هناك ١٩ تعليقًا:

Q80MINI يقول...

منو اخوج؟
حمود والا عبود والا صويلح:P?

وانتي اي وحدة؟
لايكون اللي يم المرحوم اللي يخزها ؟ :P

بصراحة ايامكم عجيبة
وجيلنا شوي فيه من جيلكم يعني سوالفكم احس قريبة من سوالفنا

وسالفة الباباي صج كنا متعقدين منها

om-bukhnag-zare :) يقول...

صبحج الله بالخير يالغالية :)ا
يا حلوج وياحلو اخوانج .. والله يخليلج اخوانج ولا يروعج عليهم .. وصدقتي ياوخيتي الأخو عضيد وسند
بس سالفتكم سالفة على هالبابايات
صج طماشه احنا أول :) تعالي صج لا يكون اخوانج حمود عبود ؟؟ :)ا

اذكر اول يوم اني اصغيره حيل انخش ورا امي مستحية لطلع مذيع نشرة الأخبار !! شكوووووووووووووووووو :)ا
صج افشل :)ا

الله لا يحرمنا منج يالغالية ولا اطولين بغيابج

بنت الكويت يقول...
أزال المؤلف هذا التعليق.
بنت الكويت يقول...

الله يخليلج اخوانج ويطولج بعمرهم ويخليج لهم
والله لا يفرقكم

وسالفتكم سالفه مع البابايات
وانت كنتي زعيمة العصابة والعقل المدبر
والله البنات مو هينين ههههه

عالية يقول...

قوة خالتي قماشة لووووووول

يعطيج لاف عافية عالقصة الحلوة وصج سالفة رسوم المتحركة عقدتنا كلنا

مشكورة عالقصة وناطرين المزيد منج

Q8DOLL يقول...

ياااااحلوج ويا حلو سوالفج والله
طلعتوا من المسجلين تاريخيا بتلفزيون الكويت
بعدين انتو اللي ماخذين مقراض النفيسي؟

وااي موتيني من الضحك صج طفولتج فيها شوية طق وتمجع بس حلوه واااايد
عسى ايامج كلها حلوه
ويخليلج اخوانج يارب ودايما يكونون سند لج الله يحفظهم
بس بين سالفه وسالفه لا اطولين وايد جابلينا شوي :)

Q8DOLL يقول...

ياحلو سوالفج يا قموووش والله اني استانس وايد لما اقرا اي بوست منج مع انج تغطين واطولين وايد على تكتبين
الله يحفظ خوانج يارب ويخليهم لج
أثاري طفولتج موثقه بالتلفزيون بعد ؟؟
ههههههههه
اكيد انتم ماخذين المقراض
مع ان ذكرياتج فيها طق وتمجع بس حلوه واايد وبريئه
بعدين ماظن عبود خلود وصويلح مو اخوانج لانهم ماكانوا مصابين ؟؟
قواج الله :)

عالية يقول...

يعطيج مليون عافية ياقموشة وصج براءة

عسى الله يخليكم لبعض

ReLaaaX يقول...

تدرين عاد ؟ اشوه شفتو جدامكم ان ماكو شي بالتلفزيون لأن احنا اثبتت هالفكره في بالنا مده طويلة واللي زاد الطين بله على قولتهم .. بباي قدييييم يطلع من السجن وينخش بالتلفزيون ويغيرون القنوات واهوا يغير تمثيله

فيعني كنا مصدقينهم :)


--

اي صج قوليلنا منو اخوانج ;p

Unknown يقول...

الصراحة عجيب البوست :)
بس الصراحة عليج شطانه الله يستر منها
:) تخوفين انتى وام بخنق

والزعيمة بعد ما يبيله ام الحفيز

عسى الله يخليلج اخوانج ولا يخليج منهم
دب الابد :))

عثماني يقول...

صبحج الله الخير اخيتي الغالية

خوش سالفة

يحليلج ... و يحليل اخوانج...حافظكم الرحمن

اثراكم عايلة فنية و انا مادري

Abdulla Al Ameri يقول...

يا حليلكم
و يا حلو سوالفكم

عاد احنا كنا مجرمين


على أيام حميدو

ننطره لين مايشوت عشان نشوت على التلفزيون

الزين يقول...

والله يا قماشه
سوالفج حلللللللللوة
وما تنمل
افيه
فيها بساطة وبراءة وكل شي حلو نفتقدنا بأيامنا هذي

الله يحفظ لج اخوانج ويحفظهم لج
على قولة امي الله يطول بعمرها

الريل آجده
والولد آلده
والأخو مالي حد يالده

الأخو ما يتعوض ابد

Mohammad Al-Yousifi يقول...

الله يخليكم حق بعض

و اوموه شنو اسمه؟

أمية؟

خسرتني للأبد يقول...

الســ عليكم ــلام
هههههههههههههههههه
احلاشي ان انتي الي قاعدة اتخططين و اخوانج ينفذون
بس شنو راح يصير فيكم لو ان ابوج شاري التلفزيون من اموو و اموو مخلي التلفزيون حق ابوج بالحوش وانتوا كسرتوه
ترا التلفزيون كان غالي بذاك الوقت

فراوله يقول...

مساج الله بالخير والكرامة
غاليتي قموشة الحبوبه
والله يازينج ويازين سوالفج
وبعدين شطرا عليكم سالفة هالبايبات
تراها سوالف الصبيان!!!بس انتي طلعتي منتي هينه
بالمره
@@@
قولي آمييييين الله يخليكم لبعض
ولا يفرقكم ويدووم عليكم نعمت
اليمعه
والله يختي ترانا بدونهم مانسوي شي
دمت بحب وود
:)

What Will Be , Will Be .. يقول...

صباح الخير

:)

سوالف عجيبه
وقصيصج تونس حدهاا

بس التفلع اللي بالقصه ماله اول ولا تالي

:))

الله يخليلج اخوانج
ويسعدكم ويرزقكم وويوفقكم

يقولون يكبر وينسى اذاري ماينسى خنت حيلي حيلج
:))

فراغات يقول...

صج مغامراتكم حلوه يا خالتي قماشه :)
طفولت زمان مو مثل طفوله الحين ...حتى البابايات تغيرت افلام الكرتون الحين علمت اطفالنا العنف والقسوه
وشطانه اولا الحين الله يستر عليهم كلا ضرب في ضرب
تسلمين على هذا الموضوع

hamdool يقول...

شطانتكم عجيبه

خالي كان معاهم بالأوبريت
وأعتقد أقدر أسأله وراح
يقول لي منو أخوانج

:)

الله يخليهم
وما يحرمكم من بعض
يا رب