بسم الله الرحمن الرحيم
اخواني وخواتي
السلام عليكم ورحمة الله وبركاته
السموحة ادري انى طولت شوي
الضغط كان عندي مرتفع
والحين انا أشوه
اليوم بقول لكم سالفة من سوالفي العتيجة
اللى نقدر نسميها موقف حصل
من دفتر حياتي على زمان جميل انتهى
وهذي ماهي إلا ذكريات حلوة محتفظة فيها للآن
وأرجو أن لا يساء الفهم او يزعج أحد ويكون معترض وموراضي
لان السوالف هذي كان فيها براءة ومواقف
تقدرون تقولون كان لها جوها بذاك الزمان
سالفة اليوم محفورة بالذاكرة ( حشه تايتنك )
كانت عندنا مدرسة
كل يوم والثاني غايبة
وكله تبجي تبي تروح حق اهلها بفيلجا , دايما تشتكي لنا
انها متلعوزة وتبي تروح فيلجا
واحنا عاد وناسة , طايحين له بحصتها سوالف معاها
عادي المدرسة تسولف معانا اول عن حياتها
تدرون ليش لانه البنات اللى بالصف كبرها او اصغر منها بشوي
يعني عادي بثالثة متوسط عمرها 19 وله 20
عاد انا مو منهم كنت صغيرة
المعلمة هذي من تغيب الصف يصير خلية نحل
هذرة ولوية
اللي يشوف اشكالنا بذاك الوقت يقول أبد مو يايين للدراسة
يايين بس للسوالف والهذرة
لاه بعد بقول لكم عن شغله ثانية
كل شهر تتزوج وحدة من البنات
او وحدة يطلعونها من المدرسة بحجة بسها تعليم او نبيها تعاون امها بالمطبخ وتشيل خواتها
مساكين احنا قبل
طلعت البنت من المدرسة بإشارة من أهلها
دشت علينا المشرفة العودة وغبرتها ثايرة علينا من سمعت اصراخنا
طبعا طاحت له زف فينا
وقالت انا اعلمكم
إلا افرقكم عن بعض
يعني تفرق كل وحدة عن رفيجتها اللى قاعدة يمها عشان تخف الهذرة
اعترضنا
اعترضنا
واعترضنا
وماكو فايدة
طبعا حقدنا عليها وفاولنا عليها
ما مشى الاعتراض وفرقتنا وشنقلت الصف على بعضه
واحذفت بشروه عند حصوه وحطت يمي زهروه
وقالت هذا الوضع وماراح يتغير
نسيت اقول لكم ان مكانى آخر شي بالصف
مو كله ناجحه جوازا وين بكون قاعده بأول الصف
طبعا لا
وزهروه ماطولت اسبوعين وتزوجت
وفضى الكرسي اللى يمي وزهروه راحت وصار الكرسي عزيز علي
لانه مريحني للآخر
مرات تلقوني حاطه جنطتي عليه ومرات ملابسي الرياضة ومرات أمد رويلاتي عليه
يعني تقدر تقولون شطانة
واحلى شي اذا كان عندي لون وكان طايح بجبدي
أشخبط على الكرسي
واكتب مع حمد قلم أو يعيش فريجنا يا .. يا .. يا .. ( شكو مادري) من ضيجة الخلق
مرت الايام على هالوضع لحد مادشت علينا المشرفة وقالت لنا في طالبات وافدات من دول اسلامية راح يزورونكم جم حصه
وبيدرسون معاكم وياويلكم ان تحرشتوا فيهم , مالكم شغل فيهم
بيدرسون ويمشون ولا تفشلونا
طبعا تليقفت وسألت شنو يعنى وافدات
قالت لى عن الهذرة الزايدة
المهم
دشوا علينا سبع بنات مو عربيات ومعاهم كتبهم ودفاترهم
اعذروني مااذكر دولهم لصغر سني ذاك الوقت بس دولة وحدة منهم اللي راح أقولكم سالفتي وياها
طبعا اهما دشوا ولا سلموا علينا
كانوا ماشيين طابور ورا بعض واتسندوا يم الطوفة اللى وراي
واسمعوا الشرح واكتبوا اللى يبون يكتبونه وراحوا
ثانى يوم
كان علينا عربي بس هالمرة الوافدات يابوا معاهم كراسي من الصف اللى يمنا
ماعدا وحدة تنبلة
يايه جطل إيد ورا وإيد جدام
تدرون ليش
لانها حاطه عينها على كرسي زهروه
جان توقف يم كرسي زهروه وتحط إيدها على الكرسي
قلت لها روحي ييبي كرسي مثل رفيجاتج
واذلفت
ثاني يوم رزت ويها وانا اوخرها
وثالث يوم نفس الشي وزادتها
وانا اكرر كلامى لها او انى اعناد احط جنطتى على الكرسي وهى تذلف وتخزنى وخزتها عاد تخرع ديرة
بقول لكم اوصافها
صنقل (طويلة) ومتروسة وشعرها كشه اتثبته بمليون ماشة وماكو فايدة
كشتها طالعه طالعه وفيها شبه كبير من تايسون الملاكمجي
من اشوفه اذكرها
البنات من يشوفونها تخزني يخترعون ويأشرون لي من بعيد ويقولون قمشووه الله ياخذج عطيها الكرسي واللى تقول لي دير بالج من هالأفارقة ترى يخرعون وهذي جنها حاطه خنجر بمخباتها راح تغزج فيه
وانا اقول يا أنا يا اهي وماراح اعطيها الكرسي
وايد كانت غاثتنى ومتملله منها وخزتها كنت غريبة
لحد ذاك اليوم اللى اذكره عدل
كانوا داشين قبلنا واحنا كنا بره
فشافوها بعض البنات ماخذه الكرسي
ويو قالولي عاد انا اهنى انفلت والبنات وراي
وسيده رحت الصف جان القاها ماسكة الكرسي وتخز
جان اصرخ عليها واقول لها خليييييي الكرسي يا كونتاكونتي يا ام كشه
بس قلت لها جذي
اهجمت علي واسحبتنى من قولتى وإيدها الثانية حطت أصابعها يم عيوني
( وين مرايلج يا قمشوه وين راحت )
واصرخت علي واهيا معصبه جان تتكلم بصوت يشبه الزئير
والله زئير اسد وصوتها خشن
قالت لي
اووه ويلالووه ناقصها اهني طبل
وتقول
مرة ثانية قول كونتاكونتي , مكشه , أطلع عينك إنته إسمعني ... انته اسمعنييييي اطلع عيييينك
واااااااااي واي الصوت يخرع انا وين فيه , مادري صرت خرجة بإيدها وأتلفت يمين يسار
وين رفيجاتي ماكو أحد كلهم برع ماميش حد
صرت طماشة مو قماشة
صعبه اشرح لكم حالتى ووضعي مع الزئير الطرزاني
طبعا هذا كله واهي ماسكتني وزين ما عمتني واصراخها عالى وما تهدني
واشوه ما نقذني من إيدها غير المشرفة وغصب بعد
المشرفة خافت علي وقالت لي قماشة روحي بيتكم أحنا وايد خايفين عليج منها
والمشرفات قاعدين يهدونها وماكو فايدة قاعدة تصارخ
طلعت من مدرستى الزهرة ركض ووصلت لى مسيد الساير عاد اهنى دخت وبالغصب وصلت البيت
يدتي الله يرحمها اخترعت من حالتي ومن يومها وانا مسخنه ومخترعة
وكل يوم يودوني المطوعة وتقرا علي
ويدتى الله يرحمها ما قصرت قالت حق كل الفرجان عني
وزارونا وصار بيتنا عرس
ناس داشة وناس طالعة
يا حلات أول
تحسنت حالتي ورجعت المدرسة
واشوه كانوا الوافدين ماشيين
فكه ارتحت
وبعد جم يوم نادتني المشرفة
وما اشوف إلا التنبلة موجودة
طبعا اخترعت ذيج الخرعة اللى ماكو منها
جان أشوفها تبتسم لي
ومدت إيدها تبي تسلم
وانا ماعطيتها ويه جان تقول لي
إسمي سـُـليماته من جزر القمر وانا اعتذر واريد ان أعطيك هديه ( عاج فيل )
طبعا انا اسمعها واخاف اطالعها
والمشرفة تقول قماشة اخذي الهديه
جان آخذها غصبا علي
وراحت سليماته ورجعت قمشوه لرفيجاتها
وطنازتهم استمرت طول السنة
هناك ٤٣ تعليقًا:
هلا قماشة
سالفتج ذكرتني بأيام زمان والنجاح
جوازا لأن في وايد لو مو منجحينهم
جوازا شان لحد ألحين بالمدرسة
وبعدين يحليلج ليش النحاسة شان
عطيتيها الكرسي وهي بعد باسها قوي
بس كانت واثقة إنها بتييبج قوع إذا إحتجيتي
بس يالله النجرة يات بفايدة عطتج عاج
فيل
إن شاءالله تكونين محتفظة فيه
لأنه ذكرى حلوة وعليج بالعافية
سلامات وما تشوفين شر
--
قاعده أقرى البوست وميته ضحك وتخيلت شكلج وهي ماسكتج
وانت خرجه بيدها
.
واكيد بتذكرين اليوم هذا عدل
ليش هو ينسي أصلا
هههههه
يا حلوج ويا حلو سوالفج
صباح الخير
أضحك لا لا مابضحك
بطني عورني من الضحك
بس وين العاج ابا اشتريه ممكن و لا هدية تعتزين فيها
ماشالله عليج يا خالتي قماشة خليتيني اتخيل و اعيش الجو اللي كنتي فيه
صج كانت ايام حلوة بس قبل ماتيي سليماتووووووو بيبي ماتوو
تسلمين على هالسالفة الحلوة و لا تحرمينا منها
صبحج الله بالخير اخيتي قموشه :)ا
ماتشوفين شر يالغالية وديري بالج على صحتج كلش ولا اخيتي الغالية قموشه ام الخير :)ا
الله يغربل ابليسج اضلوعي عورتني من كثر ما ضحكت .. قمشوووه صرتي مثل ام ناصر السان طويل والحيل قاصر يومنج منتي قد كونتاكونتي ورااااااااااج اتحرشين فيها وتحطين راسج ابراسها :)ا
أهم شي اني عشت الدور معاج صورة صورة :)ا
طلبتج قمشوووه ضرس الفيل حطي لنا صورته :)ا
الله لا يحرمنا من سوالفج سوالف اول :)ا
ياحلاتج وياحلات سوالفج ياقموووشه
والله احس انج على هالسوالف شنو تهبلين وودي اقعد يمج وتسولفينلي
وقصه حلوه وسالفه تينن
قواج الله ياقمشه ولاتبخلين علينا بهالقص المميزه
مساج الله بالخير اخيتي الغالية قماشة
الله يهديج ..تحطين نفسج في مواقف بايييييخة.... و الا انتي وين و سليماتة وين!!؟ هذيج مصكة... و انتي جنج زرزور بيدها... المرة الثانية ديري بالج و انا اخوج...هالمرة سلمتي المرة الياية ما يندرى شصير
عاد انا جني خابر واحد اسمر امة اسمها سليماتة... بقولة عن سالفتج ... يمكن نرجع العلاقات الدبلوماسية بينج و بين مدام سليماتة
تسلم ايدج اللي اكتبت هالسالفة ونستينا تونسج العافية
هههههههههههههههههههههههههههههههه
والله صج احنا ناس نخاف ما نختشيش
سليماااااااااااته
اخييييييه لو انا ولد يرانكم
جان اخرعج
واسوى لافتة الصقها جدام بيتكم اكتب عليها سليماااااااتة
واحط علم جزر القمر فوق بيتنا
:))
ضحكتينى من صج قعدت اكركر عليج
يعنى شكو مسوية نفس بطلة على الاخت
والله انتى عسل قاري كل مغامراتج وميت من الضحك
صدقتي يا كادي
هوبس باسها قوي
عليها زئير قوي
راحت وراحت ايامها
على طاري العاج
ما احتفظت فيه لانى كنت كارهه راعيته
ومشكوورة حبيبتي على ييتج
بنت الكويت الله يسلمج ان شاءلله ويبعدج اشكال سُليماته
والله يمكن حتى نوم ما تقدرين
والله يعطيج العافية على وجودج وتواصلج
استاذ بلاليط
تتخيل الموقف اي
لكن تعيش الجو ما أنصحك ما انصحك ما انصحك
كانت تايسون اللى كله اذون اللاعب
ومشكووووووور على الزيارة
والعاج راح في خبر كان
ام بخنق
يا هلا بالطش والرش
الله يسلمج من الشر يا بعد عمرى
واي ام ناصر واي ام خليل يا ام بخنق
بغيت اروح جفي بيدها
والله الافارقة ترى يخرعون بلد
وبالنسبة لضرس الفيل بقولج شنو كان شكله
كان عاج نفس حرف الإلـ بالانقليزي طول الإصبع
وايامها ماكنت ادري شنو قيمة العاج هذا
فــ ضيعته ومادري اصلا وين وديته
وحزتها كنت ما اشتهى ويها فما احتفظت فيه
ومشكورة يا بعد طوايفي على تواصلج
شيومه الامورة
تسلمين على كلامج اللى ينقط عسل
ومع انج اصغيرة بس تحبين تسمعين سوالف قبل
والله يكثر من امثالج يا حبيبتي
عثماني
فالك ماقبلناه
لا بتعرف على سليماته وعلى خالة سليماته وعلى اهلها اللى بجزر القمر كلهم
انته اسمعني
انته اسمعني
لا يقول كونتاكونتي سليماته
لاتخرعنى
اسمعنى ترى أهاجر
ومشكور يالعثمانى على تواصلك
مشاري
اروح لك فدوة وارجع لك بوانيت
بس انته اسمعني
لا تسوي جذي
وتصير نفس بنات الصف
اللى ادور يمين ويسار مالقاهم
ابيك عون مو فرعون
اوووووه ويلاااااااه لووووه
( زئييييييييييييير )
وعسى دوووم تضحك
مجهول
عسى دوم الضحكة ما تفارقك يا اخوي
الســ عليكم ــلام
ودوج حق المطوعة و كونتاكونتي
هههههههههههههههههههههههه
هههههههههههههههههههههههه
هههههههههههههههههههههههه
هههههههههههههههههههههههه
ههههههههههههههههههههههههه
هههههههههههههههههههههههه
هههههههههههههههههههههههه
هههههههههههههههههههههههه
هههههههههههههههههههههههه
ههههههههههههههههههههههههه
قماشة لازم اترجمين بعض المفردات
لابالله صج انج
طماشه منتي بقماشه
لووووووووول
اكثر شي ضحكني
ليإسمي سـُـليماته من جزر القمر وانا اعتذر واريد ان أعطيك هديه ( عاج فيل
ههاهاهاهاي
ملاحظه: الخط وااااايد صغيير
الله يا سوالفج.. غشيت من الضحك
احييج على الاسلوب الساخر والساحر
معرفة خير انشالله
بس شسالفتج مع بنات الدول الاسلامية؟؟؟
واااااااااااي
هههههههههههههههه
غشيت من الضحك
سليماته زووغه
هههههههههههههههه
وانتي بلاج بس اتحرشين بالأوادم
شوفي شنو ياج من كونتاكونتي
مساج مسك وعنبر
غاليتي قماشة
يا حلوج ويا حلو سوالفج
صج تشرح القلب
بس الله يهداج اشحقه تحرشين بالبنت؟؟
بس تدرين الحمدلله اللى يات على جذيه
والله ستر
وبالاخر خذيتي هدية
بعد شتبين @@@
تحياتي لج ولسوالف الحلوه
يالغاليه
:)))))))))))
لووووووووووووووووووول
لا لا والله العظيم بجيت وعيوني دمعت من الضحك
كونتاكونتي الطنطل طلعت من جزر القمر؟؟
انا اقول المواصفات والزئير مستحيل تكون من سكان الأرض
الحين انا احاتي العاج ؟؟ سويتي منه ترجيه والا شنوو ؟
بعدين شنو العاج ؟؟ يعني اهيا ذابحه فيل واااي الله ارحمهج وفكج منها
قموووش "طاحت الميانه" بعد عمري كثري من هالمواضيع الحلوه مثلج
لووول قصصج عجيبيه .. بس اقرأ أنعس :) شغلات وسوالف ممتعه حيل .. حسافة ماكان عندي مغامرات بطفولتي
واصلي محتاجين حزاوي
قماشه
الله يهداج
احنا ويين
والافارقه ويين
انتي الغلطانه
هذي اسمها شريعة الغاب
وانتي مااحترمتى هالشريعه
لووول
صج كسرتي خاطري
:(
وبنفس الوقت :)
لوول
خطاج السو يالطيبة
كلش و لا بنات براحة بو عباس
وينه العاج ؟؟ موجود؟
السلام عليكم
اختى قماشه:انت لحقتى على ست رويده
ناظرة مدرسة الزهراء
تتذكرين اسم مدرسة الانجليزى
واسم مدرسة الحساب
اللى يدرسون رابعه متوسطه
شكلج والله منتي هينة وكنتي شرية وانتي صغيرة... بس على أي حال خطاج السو يالحبيبه... ما تشوفين شر
:)
خسرتني للأبد
وعليكم السلام
ودوني حق المطوعة وشربوني ماي مقرى عليه
و على طاري المفردات
قول لي وانا أوضح لك يا اخوي
What Will Be , Will Be
عشان الواحد لا يصير طماشة لازم ياخذ درس من كل موقف تعلمه
( صغرها تصغر وكبرها تكبر )
والخط اشوفه ازوين
مادري ليش يطلعلج اصغير
بس ولا يهمج بكبره عشان المرة الياية
بوساكت
سوالف عتيجة من دفتر حياتي على زماني حياتي على زمان جميل انتهي
اشكرك على حضورك
وبنات الدول الاسلامية حبايبنا وماعليهم الا العافية
نون النساء
والله يالغالية ياني مطشر قوي منها
زين ما بطت عيني
وعسى البسمة ما تفارقج يالغالية
فراولة
هلا بالغالية
اشكرج على كلامج اللى مثل العسل على قلبي
وهذا قدر واحنا خذيناه في الدنيا
Q8DOLL
مو بس جذي
هذي شكله ذابحه يله وشالعة العاج مالهم
مو هينه هالسليماته
لعوزتني أيامها
حتى عاجها مادري وين وديته
واحنا حاضرين للطيبين أمثالج وشرواج يالعزيزة
محارة
تقرين لي وتنعسين
أفااااااااا ليش بس ليش
انا ابيج واعية عشان تعيشين الجو الزئيري
ونورتي يالغالية
Spolid Royality
اي والله
صدقتي يالغالية
المفروش انى انتبه للافرقة وقوانين شريعة الغاب
بس ايامها مايت على بالي :>
وحياج الله بالفريج
كله مطقوق
خطاك اللاش يااخوي منور بزيارتك لنا
والعاج رااااح في خبر كان
وحياك الله
شتاء
اللــــــــه
أخيرا اطلعت لي رفيجة كانت بمدرستي
يا اهلا وسهلا
ذكرتيني بالناظر اللى كانت دايما تلبس ملابس سوده وشعرها اسود
وكانت رشييقه
وبالنسبة للمدرسات انا ما أذكر اسمائهم
بس أذكر مدرسة الانقليزي فلسطينية
ومدرسة الحساب مصرية
بس ناااااااسية اساميهم
اللى اذكره المدرسات الكويتيات
عندج كوكب المطوع اللى تدرس اجتماعيات
وليلي السجاري
وحياج الله بالفريج
نورتينا يا شتاء
بوغازي
يا حيالله بالقاطع
غبت عنا هاليومين وفقدناك
وحرام عليك ما كنت شريه يا خيي
دنه غلباان
والله يسلمك من الشر
أنعس الله يسلمج من كثر ما أدش بالجو .. انا لي فلسفه غريبه لما أسمع القصص أنسجم وانعس !!
مافى احد من بنات جبله ولا حربم ولا ريايل ولا عيايز جبله
مايعرف ست رويده العلمى ناظرة مدرسة الزهراء رحمة الله عليها هى وست مفيده العلمى مدرسة الانجليزى وست سعاد عفيفى مدرسة الحساب رحمة الله عليهم
كانوا من افضل المعلمات منذ تاسيس مدرسة الزهراء فى بداية الخمسينات
ننلمذوا على ايدهم كل بنات جبله
وفى منتصف الخمسينات بدات الاسر الكويتيه النزوح من جبله للمناطق الجديده خارج السور مثل الشويخ والشاميه وكيفان وغيرها
اعتقد ان الفتره اللى تتكلمين عنها
هى نهاية السبعينات و بداية الثمانيات
بعد كلام شتاء افتكر بانت فيلجا :)
اختي شتاء
كلامج كله غلط
بس اسم الناظرة صح واختها صح
والثالثة ما مرت علي بصراحة
والرحمة على الحي والميت يا وخيتي
بوصالح
بانت فيلجا بانت
بعد كلام الخريف بان السخيف
حلوة قصتج قماشة
يا مساء الفل يا احلى واجمل انسانه يا قماشة
كل ما أقرالج بوست اموت من الضحك
وهالمرة مت من الضحك خصوصا على الزئيرررر الافريقي
الله يهديج جان من الاول عطيتيها الكرسي
والباب اللى اييك منه ريح سده واستريح
عموما
اشكرج على اضفاء روح المرح علينا
واحنا بانتظار بوستج القادم
مو تطولين علينا
وما تشوفين شر وديري بالج على ضغطج :>
علمينى شنو الغلط فى كلامى
اهلى من جبله واخواتى الكبار كلهم درسوا فى الزهراء
وبالرغم من انتقالهم من جبله الا انى درست فى الزهراء بالستينات
وماكانت حتى هذا التاريخ
اى مدرسه كويتيه
ردى على شنو الغلط
حتى انا من جبلة و اهلى من جبلة
والغلط انى ماكنت موجوده بزمانج او الفترة اللى كنتي فيها بالزهره
واتمنى اي تعليق يكون داخل موضوع البوست
وحياج الله بالفريج
هلا محارة اسمحيلي تاخرت عليج
مو انا استغربت لانه السالفة فيها اكشن وانتى تقولين نعستي
الظاهر ان طبعج غريب من نوعه
والله يحفظج يالغالية وتسلمييييييين على ييتج للفريج يا احلى محارة
مجهول
مشكور اخوي على ييتك
الدنيا الغالية
الشر ما اييج ان شاءالله
والحمدلله على كل حال
وقولي امين
عسى البسمة والضحكة ما تفارق شفاج
ومشكوورة على ييتج
يمه يمه يمه متتتتتتتتتتت ضحك وين طحت على بلوقج
والله طلعتيني من مود السياسه والبلوقات جزاج الله خير وقعدت اقراا وخااصه سالفه البحر لوووووووووووووووووووووووول
والله ابدااع لاتحرمينا من سوالفج الحلوة
اختج شواقه
مساج الله بالخير اختي..
الله يعطيج العافيه ذكرتيني بأيام الدراسه والله انها حلوه على كثر الهوشات والزف من المدرسات بس يبقى لها ذكرى حلوه في نفوسنا ^_^
مشكوره عزيزتي..
تحياتي :))))))))))))
لووووووووووووووووووووووووووووووول
ههههههههههههههههههههههههه
سلمااااااااته
والله سوالفج اتيييييينن
اول ما شفت البوست
قلت طويل
شخلصه
دقيقتين و الا انا ميته ضضضضضضحكك
صصصصصصصصصصج بوست ممتع
اشكرررررررررررررررررج
بس الله يعيييييييينج صراحه
الله ستر عليج
انتي ترى مغامراتج قبل مافيها غشمرة
كل مغامراتج قشرة
يا متكافخة مع سليماته(حشى اسم ينية)
والا مهربة المسكينة بشرى ومنحشتها
والله صج الله ستر عليج:)
حمدي ربج بس
والله يستر من سوالفج الياية
يا هلا والله بشواقة
عساج دوم مبتسمة وتضحكين فرح وبسعادة
وحياج الله دوم عندي
امبراطورة اشعاري
يا حيالله بمن زارنا
ادري انى مقصرة وما امر عليج
بس لج اللى يسرج
وذكريات المدرسة يا حلاتها كلها مغامرات وشغلات تونس
ومشكووورة حبيبتي على ييتج عندنا بالفريج
lawyer
يا هلا بالمحامية يا هلا بالطش والرش
عساج دوم مبتسمة
واللى اينن هو انتي وضحكتج الحلوة
Q80MINI
اي والله
الله ساتر علي ولا جان صرت فص ملح وذاب
ويا حلو مغامرات قبل
كان لها طعم غير وشقاوة ثانية
اشكرك على ييتك الفريج
انتي عسسسسسسسسسسسسسل
إرسال تعليق